Ozamiz City | Sa gipatawag sa Provincial Government sa Misamis Occidental pinangulohan ni Gobernador Henry Sevilla Oaminal Sr., ang National Irrigation Administration X (NIA X) uban sa ubang ahensya sa nasudnong kagamhanan mipasalig sa paghimo sa dinaliang rehabilitasyon sa mga pasilidad sa irigasyon.
Gikataho nga ang walay hunong nga pagbunok sa ulan dala sa shear line nga milungtad og upat ka adlaw nakadaot sa minilyon nga kantidad sa mga kabtangan, imprastraktura, ug agrikultura sa probinsiya.
Alang sa probinsiya, ang gibanabanang kantidad sa mga istruktura sa irigasyon nga naguba nikabat sa P78 milyones nga gilangkuban sa mga irrigation dams ug terminal facilities.
Kawhaag-tulo ka mga asosasyon sa irigasyon ug 4,092 ka mag-uuma nga adunay service area nga 2,123 ka ektarya ang gikatahong apektado sa tibuok probinsya.
Ang convergence initiative gitakda aron sa pagkonsolida, pag-finalize ug pagtimbang-timbang sa mga solusyon nga gibutang ug dala sa pagbaha lakip na ang mga kabalaka ug danyos aron ang kagamhanang probinsiyal makatubag subay sa dinalian ug hinanaling pagbangon gikan sa katalagman.
Nagrepresentar sa NIA X Regional Manager nga si Engr. Leonila E. Tenestrate sa nahisgutan mao si Engr. Elpidio D. Lucernas, Jr. division chief sa Lanao del Norte-Misamis Occidental-Misamis Oriental-Camiguin Irrigation Management Office (LAMISCA-IMO) ug satellite head sa Misamis Occidental, Engr. Sancho P. Hipe.
Photo Credits: Shaina Nagtalon |
PIA Misamis Occidental
No comments:
Post a Comment