𝐇𝐎𝐔𝐒𝐄 𝐏𝐀𝐍𝐄𝐋 𝐂𝐇𝐈𝐄𝐅, 𝐇𝐀𝐍𝐃𝐀𝐍𝐆 𝐌𝐀𝐆-𝐈𝐌𝐁𝐄𝐒𝐓𝐈𝐆𝐀 𝐒𝐀 𝐍𝐀𝐈𝐀 𝐓𝐄𝐂𝐇𝐍𝐈𝐂𝐀𝐋 𝐆𝐋𝐈𝐓𝐂𝐇

Bukas si House Transportation Committee Chair Romeo Acop na magsagawa ng imbestigasyon tungkol sa nangyaring technical glitch sa Ninoy Aquino International Airport (NAIA) noong Linggo.

Aniya, kung mayroong kongresista na maghain ng resolusyon, ay handa itong magsagawa ng pagsisiyasat.

Interesado rin kasi si Acop na malaman kung nagkaroon ng kapabayaan kaya nagkaroon ng aberya ang operasyon ng paliparan.

Punto ng Antipolo solon, dalawang taon halos hindi nagamit ang NAIA dahil sa COVID-19 restrictions at bago muling binuksan ang paliparan ay dapat nakapagsagawa muna ng maintenance o audit assessment.

Ginawa pa nitong halimbawa ang sapatos na matapos hindi aniya magamit ng ilang taon ay “ngumanga” na nang muling isuot at sasakyan na dalawang taong hindi pinaandar na dapat ay masuri muna bago muling gamitin.

“Dapat ay gumawa ng maintenance assessment o maintenance audit para nakita yung problema…. Did they (CAAP) do it?” tanong ng mambabatas.

Babala pa ng kongresista na hindi na katanggap-tanggap kung muling mauulit ang naturang aberya.  | via Radyo Pilipinas